10 ཟླ09པ།

དགེ་རྒན་དྲན་པའི་མགུར་དབྱངས་དད་པའི་རང་མདངས།

ཡོངས་ཁུངས།:སྐད་འཕྲིན།  རྩོམ་པ་པོ།:མགར་རྒྱལ་སྲས།

微信图片_20170910130929.jpg

ཡོན་ཏན་རིན་ཆེན་མཛོད་འཛིན་པ། །

ཤེས་བྱའི་ཁྲིད་སྟེགས་སྡིངས་ན་བཞུགས། །

རིག་པའི་ལྡེ་མིག་བསྩལ་མཛད་པའི། །

དགེ་རྒན་ཁྱེད་ལ་བདག་ཕྱག་འཚལ། །

ལྷག་བསམ་བདུད་རྩིའི་བཞུར་རྒྱུན་ལས། །

ཤེས་རྨོངས་སློབ་བུའི་སྐོམ་གདུང་སེལ། །

ཐུགས་རྗེས་རིང་དུ་གཟིགས་པའི་མཐུས། །

རིགས་ཀྱི་མྱུ་གུ་ལེགས་པར་བསྐྱངས། །

སྒོ་སམ་གྲུ་བཞིའི་འགྲམ་ལོགས་སུ། །

ས་སྨྱུག་རྡུལ་གྱིས་གཡོགས་མཛད་པའི། །

རིགས་ཀྱི་སེམས་དཔའ་དགེ་བའི་བཤེས། །

སློབ་བུའི་མགོན་གྱི་ཉི་མ་ཡིན། །

ལས་བྱའི་འབྲི་དེབ་བྲག་ལྟར་བརྩིགས། །

ནོར་བཅོས་བཟང་བསྟོད་དུས་ཀུན་མཛད། །

གདུལ་བྱ་ལེགས་ལམ་འཇུག་མཛད་པའི། །

དགེ་བའི་བཤེས་གཉེན་དད་པའི་ཡུལ། །

ཟས་གོས་ངན་ངོན་འཚོ་བས་བརྒལ། །

དུས་ཀུན་སློབ་མའི་མདུན་ལམ་དགོངས། །

ཐུགས་ཀྱི་བཞེད་པ་རིགས་ཀྱི་དོན། །

ཁྱེད་ཀྱི་བཀའ་དྲིན་གང་གིས་མཚོན། །

གཞན་ཕན་ཉི་མའི་དྲོད་ཁོལ་ཅན། །

རིས་མེད་ཉི་འོད་རང་མདངས་ཅན། །

གདུལ་བྱའི་རྨོངས་པའི་མ་རིག་པ། །

ཉི་མའི་འོད་ཀྱིས་དབྱིངས་སུ་ཞི། །

ཤེས་རབ་ཟླ་བའི་བསིལ་ཟེར་ཅན། །

སློབ་བུ་ཀུ་མུད་དཔལ་དུ་ཤར། །

ཟླ་བའི་འོད་དཀར་ཤར་བའི་མཐུས། །

སློབ་བུའི་མུན་པའི་སྨག་རུམ་བསལ། །

དྲིན་ཅན་ཡན་གྱི་དྲིན་ཆེན་པོ། །

བདག་ཅན་མགོན་གྱི་སློབ་དཔོན་ཁྱེད། །

གདུལ་བྱ་རིས་མེད་བསྐྱངས་མཛད་པ། །

མི་ཕྱེད་དད་པས་ཕྱག་འཚལ་ལོ། །

རང་ཚུགས་རི་རྒྱལ་ལྷུན་པོ་ཡིན། །

ཤེས་རབ་གངས་རིའི་རང་མདངས་ཡིན། །

ཁྱེད་ཉིད་དད་པའི་རྒྱན་དུ་ཆེ།།

སློབ་དཔོན་ཁྱེད་ལ་བདག་ཕྱག་འཚལ། །

ཁྱེད་སྐུ་ཤེས་རབ་དཀྱིལ་འཁོར་ལས། །

ཐུགས་རྗེའི་འོད་ཟེར་ཕྱོགས་བཞིར་ཁེབས།།

ཤེས་རྨོངས་སློབ་བུའི་མགོན་པོ་རུ། །

སྐུ་ཡི་འོད་མདངས་སྟོང་ལྡན་ཡིན། །

ཁྱེད་གསུང་ཞལ་ལྗགས་བདེ་མོ་ཡིས། །

རིགས་ཀྱི་མདུན་ལམ་བསྒྲགས་ནས་ཡོད། །

རྟག་ཏུ་གཞན་ཕན་དོན་མཛད་པའི། །

གསུང་ལ་གསེར་གནག་རིལ་བུ་ཡོད། །

ཁྱེད་ཐུགས་ནམ་མཁའི་ཁྱོན་ཡངས་ལས།།

ཐུན་མོང་ཐུན་མིན་ཤེས་རབ་བཀྲ། །

གནའ་དེང་ཤེས་བྱ་དགོངས་མཛད་པའི། །

ཐུགས་ཀྱི་མཁྱེན་རྒྱ་མཐའ་མེད་ཡིན། །

ཁྱེད་ཀྱི་སྐུ་གསུང་ཐུགས་གསུམ་ལ། །

ཤེས་རབ་རིག་པའི་མཛོད་འཁྲུངས་པས། །

བསོད་ནམས་དུས་སུ་ལེགས་སྨིན་ཏེ། །

ཁྱེད་ཀྱི་གདུལ་བྱར་གྱུར་འདི་རྨད། །

ཨེ་མ་བདག་གི་དགེ་བའི་བཤེས། །

ཡུན་རིང་དྲན་པའི་འདུན་པ་དེ། །

བདག་གི་ཐོ་རུ་བཀོད་པའི་མཐུས། །

ཁྱེད་སྐུ་ཡང་ཡང་མཇལ་བར་ཤོག །

ཁྱེད་ཀྱིས་བསྐྱངས་བའི་སློབ་བུའི་ཚོགས། །

རིགས་ཀྱི་ཞབས་ནི་མ་འདྲེན་པ། །

དེ་ནི་ཐུགས་རྗེ་དཀར་པོ་ཡིས། །

དུས་ཀུན་བསྐྱངས་བའི་མཐུ་ལོས་ཡིན། །

སྐྱེ་བ་ཚེ་རབས་ཐམས་ཅད་དུ། །

སློབ་དཔོན་ཁྱེད་ཀྱིས་རྗེས་བཟུང་སྟེ། །

རིག་པའི་བློ་གྲོས་ཐོགས་མེད་དུ། །

མཁྱེན་རབ་ཆེན་པོའི་དཔལ་ཐོབ་ཤོག །

ཚེ་རབས་མུ་ཏིག་བསྟར་བ་ལ། །

ཁྱེད་ཀྱི་ཐུགས་རྗེ་སྨོན་ལམ་གྱིས། །

བདག་ནི་རྟག་ཏུ་སྐྱོང་བ་ཡི། །

མགོན་པོ་ཁྱེད་ཀྱིས་རྗེས་བཟུང་ཤོག །

དེ་ལྟར་དྲན་པའི་མགུར་དབྱངས་དེ། །

ཁྱེད་ཀྱིས་ཐུགས་རྗེས་བཟུང་བའི་བུས། །

སྙན་པའི་རྟ་ལ་སྦྱར་བ་འདི། །

ཁྱེད་སྐུ་བརྟན་པའི་རྒྱུ་རུ་ཤོག །

   

版权信息

Copyright © 2017 Thonmi.net All Rights Reserved.པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག
邮箱:khatse@qq.com
青ICP备12000419号-1 公安备案号:63010502000013